Óþæga, óþæga stjórnarandstaða!

Stjórnarandstaðan er voðalega leiðinleg að vilja ekki leika með í feluleiknum - eins og þetta virtist allt ætla að ganga vel. Fyrst var Svabbi - ráðherrapabbi - búinn að landa samningi sem hefði sparað heilmikið umstang og vesen, og keypt okkur klapp á kollinn, hundingjunum, frá Stórhertogunum í Evróparadís. Þá þurftu menn að opna á sér ginið og fara að fetta fingur út í samninginn - sem við ætluðum að skrifa undir hviss bæng!

Þá þurftum við að láta stjórnarandstöðumenn halda að þeir hefðu gert breytingar sem skiptu svo miklu máli að þeir gætu ekki einu sinni sagt nei við samningnum, vitandi að hann væri samt sem áður slæmur.....  Síðan voru næstum allir orðnir voða góðir vinir og sammála um fyrirvara, sem við töldum að skiptu svo sem litlu máli en hinir töldu svakalega mikilvæga.

Og nú þegar Bretar eru búnir að hafna samningnum, af því að EINN FYRIRVARANNA skipti greinilega einhverju máli - þá þurfa menn endilega að draga það fram í dagsljósið og koma í veg fyrir að við látum þá blaðsíðu í samningnum týnast áður en skrifað yrði undir. Af hverju vill enginn koma í feluleik?

Óþæga, óþæga stjórnarandstaða!!!

Trúnaðarbrestur stjórnarandstöðu

Allt hefur sinn tíma

 ,,Frumkvæðið kom frá ESB í október, skömmu eftir bankahrunið."

Tímasetning þessarrar tilkynningar er engin tilviljun - Núverandi ríkisstjórn Íslands og ritstjórn Morgunblaðsins vill inn - hvað sem það kostar. Ég velti fyrir mér hvaða flokk kjósendur VG muni kjósa næst.

En það er annað sem ég velti fyrir mér: Er lausnin á skuldabasli  - meiri lántaka?

ESB vill gera okkur að algerum þrælum sínum sem ekki munu þora fyrir sitt litla líf að nýta okkar örfáu atkvæði innan stofnana ESB til annars en að vera sammála höfðingjunum.

Er dílerinn að hjálpa dóparanum þegar hann kemur til hans með nýjan skammt? Eða hvað?

Rætt um efnahagslegan stuðning frá ESB

Í súpunni

Taleb sagði að þjóðin verði að draga úr skuldsetningu og forðast þá siðferðislegu synd að færa skuldir einkafyrirtækja yfir á almenning.

„Þetta er það sem ég hef áhyggjur af,“ sagði Taleb. Enginn hafi hins vegar haft kjark til að segja að fólk verði horfast í augu við veruleikann

 

Þetta er nokkuð vel orðað hjá honum. Þegar Alþingi samþykkti Icesave voru skuldir einkafyrirtækja færðar yfir á almenning - og sennilega að óþörfu. Það stafaði af leti stjórnvalda sem ekki töldu það þess virði að berjast gegn kúgun Evrópusambandsríkjanna. Auðvitað spilaði einnig stórt hlutverk undirlægjuháttur þeirra og ótti við það að inngöngubeiðni okkar og afsali hluta fullveldis Íslendinga til kúgaranna yrði verr tekið. Ég verð að viðurkenna að ég kalla þetta aumingjaskap og ekkert annað!

Aðalatriðið er hins vegar það að í raun er búið að búa til fordæmi fyrir því að ríkissjóður ábyrgist skuldir einkafyrirtækja og velti þeim yfir á skattborgarana. - Sem sagt ætti ég að geta stofnað fyrirtæki, slegið lán hjá einhverjum ,,tjalla", látið mig svo gossa lóbeint á hausinn og þið hin sjáið svo um að hreinsa upp eftir mig skítinn. SAMÞYKKT????

Menn ættu að skammast sín - og líka fyrir að sitja hjá!

„Þið settuð Ísland á hausinn“

Það sem koma skal!

Morgunblaðið getur geymt sér þessa fyrirsögn, því hana verður hægt að nota aftur og aftur og aftur....... svo lengi sem menn telja sig geta það sem engin önnur stjórnvöld hafa getað og aðrar Evrópuþjóðir gáfu upp á bátinn á sínum tíma löngu á undan Íslendingum - það er að segja að stjórna með gjaldeyrishöftum.

Gjaldeyrishöftin höfðu vissar skýringar síðastliðið haust þegar þau voru sett á  - en þau voru samt sem áður sett á í óðagoti og ég held að þau hafi verið mistök frá upphafi. Það hefði verið betra að láta gengið taka strax djúpa dýfu því þegar botninum hefði verið náð þá hefði krónan verið góð fjárfesting og strax tekið að styrkjast. Nú geta fjárfestar aldrei verið vissir um að hún fari ekki lengra niður, eða taki dýfu ef breytingar verða gerðar á haftastefnunni - og slíkar áhættufjárfestingar eru dottnar úr tísku út um allan heim.

Slík gjaldeyrishöft hafa aldrei virkað og eru jarðvegur spillingar og misnotkunar. Stjórnvöld munu þurfa að eyða mjög mikilli orku í að herða þau og bæta í göt, sem hver sem vill mun alltaf verða á undan að finna og nýta sér.

Núverandi ríkisstjórn sem er tengd alræðisstjórnum austantjaldslandanna beinum blóðböndum mun hins vegar halda í höftin eins og hundur hangir á roði - því að stjórna því sem  ekki stjórnað verður er slíkra ær og kýr.

Jón Daníelsson orðaði þetta nokkurn vegin svona á Bylgjunni um helgina: ,,Að vera með þessi gjaldeyrishöft er eins og ef ráðamenn væru með spjald á bringunni sem á stæði: ,,Við erum hálfvitar og höfum hvorki vit né stjórn á efnahagslífinu". Hvaða fjárfesti dettur í hug að koma með erlent fjármagn inn í landið þegar hann fær slík skilaboð".

Eftirlit með gjaldeyri hert

Borgum og brosum - eftir nokkur ár

Það fer að verða leitun að mönnum sem telja samninginn sanngjarnan - það er að segja utan veggja alþingis. Helstu baráttumenn í Evrópu fyrir því að ríkið - og þar af leiðandi almenningur á Íslandi taki að sér skuldir fjárglæframanna, einkafyrirtækja - sitja nú á alþingi Íslendinga og stjórna.

Þeim finnst þetta vera ágætur samningur - enda þarf ekki að skera niður eða hætta að skera upp á spítölum landsins vegna samningsins fyrr en frá og með 2016.

Þá verða Jóhanna og Steingrímur og þeirra hjarðir ekki lengur í pólitík og kvíða því engu nú..... niðurskurðurinn - annarra vandamál.

Uppskurðurinn - hvort sem er bara lúxus....væri ekki hægt að leggja á hann sykurskatt???

Hegðun Breta og Hollendinga ekki sæmandi

Sammála málfundarfélaginu Óðni

Málfundafélagið Óðinn sendi frá sér ályktun þar sem m.a. þetta stendur:

„Með frumvarpinu er lögð á ríkið ábyrgð á skuldum einkafyrirtækis, skuldum sem ríkið ber enga ábyrgð á og hefur aldrei gengist undir. Þeir “fyrirvarar„ sem þingmenn telja sig setja við ríkisábyrgðina skipta sáralitlu máli en með icesave-samkomulaginu er íslenska ríkinu meira að segja sérstaklega bannað að gæta hagsmuna sinna, svo sem með skuldajöfnuði gagnvart breska ríkinu. Gæti það orðið til þess að hundraða milljarða króna krafa vegna beitingu hryðjuverkalaga Breta yrði að engu.

Málfundafélagið Óðinn lýsir furðu sinni á því, ef núverandi þingmenn Sjálfstæðisflokksins reynast leggja meira upp úr því að ná „samstöðu“ með þingmönnum vinstriflokkanna í fjárlaganefnd, en að standa með augljósum íslenskum hagsmunum. Réttur Íslands í málinu er skýr, en þingmenn virðast hvorki vilja heyra hann né sjá.

Íslenska ríkið ber enga ábyrgð á icesave-reikningum Landsbankans. Með samþykkt frumvarps fjármálaráðherra ákveða alþingismenn upp á sitt eindæmi að breyta því. Óðinn mótmælir því mjög harðlega.“

ÞINGMENN SEGIÐ NEI!!!

Icesave-umræðu að ljúka

Keppni

Hvernig keppni skyldi þetta nú verða?

Verður þetta svipuð keppni eins og þegar við ólmuðumst við að komast inn í Öryggisráð Sameinuðu Þjóðanna - með því að sleikja okkur upp við aðrar þjóðir með gjöfum og fjáraustri?

Verður þetta keppni þar sem við gætum þess til hins ítrasta að styggja ekki t.d. Breta eða Hollendinga til þess að fá nú örugglega huggulegt sæti í klúbbnum?

Verður þetta keppni þar sem við stefnum að ,,skjótum sigri" og kostum til þess aðgangi að okkar auðlindum?

Hver veit????

Össur hefur nú þegar lýst því yfir að við munum ekki þurfa nein sérstök ákvæði í sambandi við sjávarútveginn, við séum svo sérstök og fiskveiðar skipti okkur svo miklu - og þess vegna þurfum við ekki neinar sértækar lausnir!!!!

Þar gefur Össur tóninn...

Það er sennilega að koma á daginn sem Styrmir Gunnarsson hélt fram í vetur, að um leið og sótt yrði um yrði það keppikefli samningsnefndar og ríkisstjórnar að loka samningi og fá hann samþykktan - sama hvað það kostaði.

Hvort að þessi keppni komi til með að svara kostnaði verður að koma í ljós en ekki er víst að kostnaðurinn skipti öllu máli - við erum keppnisfólk og þegar verið er að keppa leggja menn sig alla fram - ALLA!

Keppa Ísland og Króatía?

Lýðræðisumbætur

Það er með ólíkindum að einhverjum detti í hug að kalla það lýðræðisumbætur að ganga í Evrópusambandið - það er veruleikafirring á hæðsta plani.

Auðvitað eru þetta bara aðildarviðræður og því fullsnemmt að tala um föðurlandssvik en þetta er fyrsta skrefið í þeirri uppgjöf.

HVERJUM DETTUR Í HUG AÐ TALA UM ATVINNUUPPBYGGINGU OG EVRÓPUSAMBANDIÐ Á SAMA TÍMA eins og Sigmundur Ernir gerði????? Það er búið að vera um 7% atvinnuleysi í Evrópusambandinu - upp í 10% í Þýskalandi í - í fleiri fleiri ár..... Í GÓÐÆRINU!!!!!!

Það versta er að með því að sækja um förum við að eyða tíma í eitthvað sem skilar okkur engu - og í besta falli jafnvel samningi sem ég er fullviss að þjóðin hafnar... Það er tími sem stjórnvöld munu hafa mótorinn í hlutlausu í stað þess að vinna okkur út úr ástandinu.

Skammist ykkar fyrir að eyða tímanum í vitleysu!

Atkvæðagreiðslan í beinni

Lausnin á kreppunni!

Bandaríkjamenn verða að ganga inn í Evrópubandalagið.

Aðrar lausnir eru vandfundnar.

Þeir myndu örugglega fá flýtimeðferð!

Leita að upplýsingum um niðursveifluna á netinu

Minnisvarði á Austurvelli

Þeir þingmenn sem beygja sig fyrir kröfu Steingríms og Jóhönnu munu gera grafalvarlegan hlut.

Samningur þessi er ekki í neinu samræmi við forsendur þær sem lagt var af stað með í upphafi þegar samþykkt var að fara samningaleiðina.  Þetta er varla neinn samningur, heldur bara samþykkt á kröfum hinna aðilanna.

Það má spyrja sig hvort Jóhanna vilji samþykkja allt möglunarlaust bara til að stuða ekki vini sína í Evrópusambandsklúbbnum en hitt er aftur á móti engin spurning að það er engin tilviljun að Íslendingar fá náðarhöggið eftir 7 ár en ekki strax:

Steingrímur og Jóhanna láta það öðrum pólitíkusum eftir að bregðast við þeim vanda - Þau verða ekki lengur á þingi þá. Skammist ykkar!

Ég legg til að nöfn þeirra sem samþykkja Ice - save samninginn verði grafin í skjöld og sett á minnisvarða á Austurvelli - hann gæti til dæmis litið út eins og gapastokkur!

„Lögfræðiálitið breytir engu"